Кремль "Вагнер" тобының басшысы Пригожинді бүлікке шақырды деп айыптады. Ресейде не болып жатыр?

Conflict Intelligence Team: Ростовтан тараған видеолардағы әскери қызметкерлер "вагнерліктер емес" – қорғаныс министрлігінің қызметкерлері

Conflict Intelligence Team (CIT) зерттеу жобасының негізін қалаушы Руслан Левиев Ростовтан түсірілген видеоларда автомат асынып, камуфляж кигендер “Пригожин жалдамалылары емес” екенін мәлімдеді. Оның сөзінше, бұл Ресей қорғаныс министрлігінің әскери қызметкерлері. Левиевтің айтуынша, әскери қызметкерлер қаладағы негізгі ғимараттарды қорғаныс мақсатында қоршауға алған.

Бұған дейін желіде видеолар жарияланып, Пригожинның жалдамалы әскері “Ростовқа кіргені хабарланған еді”.

Қазақстан билігі әзірге Ресейде болып жатқан оқиғаларға реакция білдірмеді. Қазақстан-Ресей шекарасында бақылау күшейгені туралы да хабар болған жоқ. Дипломаттар “алаңдаушылық” білдірмеді.

Михаил Ходорковский Пригожиннің бүлігін қолдады

Бұрынғы ресейлік саяси тұтқын, "ЮКОС" компаниясының бұрынғы жетекшісі Михаил Ходорковский Телеграм арнасында “Қазір біз жұртқа әзірге шындықты айтып тұрған Пригожинді естуіне көмектесуіміз керек. Егер ол Мәскеуге барса, оны тоқтатуға тырысқандарға кедергі жасау керек, себебі біздің жауымыз ортақ...” деп жазды.

Ресей оппозициясы өкілдерінен әзірге Ходорковскийден басқа ешкім мәлімдеме жасаған жоқ. Украина жағында соғысып жүрген “Орыс еріктілер корпусының” жекткшісі де “Вагнер” басшысын қолдады.

Сенбі күні Ресейдің Ростов қаласына "вагнерліктердің кіргені" хабарланып, әлеуметтік желіде әскери техника мен автомат асынған камуфляждағы адамдардың қала орталығында жүргені жөнінде видео тарады.

Алайда Conflict Intelligence Team зерттеу тобы Ростовтан тараған видеолардағы әскери қызметкерлер "вагнерліктер емес" – қорғаныс министрлігінің қызметкерлері екенін айтты.