Бүгін, 12 шілдеде Алматыда журналист, Қазақстанның жаңа тарихын зерттеуші Болат Рысқожаның жаназасы өтті. Ол 10 шілдеде Алматыда қайтыс болды.
Ақпаратқа қарағанда, ол микроинсульт алған. Журналист келесі жылы қаңтарда 70 жасқа толар еді.
Болат Рысқожа Қазақстандағы жетекші оппозициялық журналистердің бірі болды. Әр жылдары түрлі оппозиция басылымдарында істеді, телеарнада продюсер қызметін атқарды.
1990 жылдың соңы мен 2000 жылдардың басында әуелі "XXI век", кейін "Свобода слова" басылымдарында тілші болды.
Азат Еуропа/Азаттық радиосының Қазақ қызметінің жетекші журналисті болды. Ол Азаттыққа АЕ/АР Қазақ қызметінің вебсайты ашылған кезде қосылды. Өте өткір әлеуметтік, саяси тақырыптарда қалам тербеді.
Зейнетке шыққаннан кейін жекелеген жобалармен айналысты, 1986 жылғы Желтоқсан оқиғасына арналған видеожоба түсірді.
Болат Рысқожа журналистикаға инженерлік біліммен келген. Түркістанда туып, сол жақта есейді. Ересек шағында өзінің ағасы публицист Сейдахмет Құттықадам (Сейдахмет Құттықадам биыл наурызда 77 жасында қайтыс болды) істеген Арқалыққа келіп еңбек етті.
Арқалықта инженерлік ортадан журналистикаға ауысты. Облыстық басылымдар, облыстық телеарналарда істеді.
Ағасымен бірге ол Қазақстанның зиялылар қауымы қатарына қосылып, алдымен бұрынғы Торғай облысының орталығы Арқалық қаласында істеді, 1990 жылдардың ортасында Алматыға қоныс аударады. Сейдахмет Құттықадам Алматыдағы журналдардың біріне шақырылды.
Бүгін журналистің жаназасына ондаған адам жиналды.
"Бүгін, 12 шілдеде қадірлі досымыз, ағамыз Болат Рысқожаны ақтық сапарға шығарып салып отырмыз. Ажал айтып келмейді», - деді Болат Рысқожамен бірге "Свобода слова" газетінде әріптес болған, Қазақстанның ардагер оппозициялық журналисі Алмат Азади Азаттыққа берген қысқаша пікірінде. Оның сөзінше, Рысқожа екеуі келер жылы 70 жылдық мерейтойды атап өту жағын ойластырып жоспарлаған.
Болат Рысқожа қаланың солтүстік айналма шоссесіне жақын "Қарасу" зиратына жерленді. Журналистке арналған ас сағат 13-те Сүлейменов пен Тоқтабаев көшелерінің қиылысындағы "Гамарджоба" мейрамханасында өтеді.
