Дональд Трамп жеңіске жетті

Ресей сыртқы істер министрлігінің ресми өкілі Мария Захарова телеграмдағы парақшасында Демократиялық партия үміткері Камала Харристі мысқылдап пост жазды:

"Псалом 30:5-тен үзінді келтірген Камала Харристің айтқаны айдай келді: "Түнде жылаймыз, ал таңертең қуанышты хабар келеді". Аллилуя деп өз атымнан қосып қояйын" деп жазды ол.

Дональд Трамп Флоридадағы штабында жұрт алдына шығып, президент сайлауында жеңіске жеткенін жариялады. Ол "Бұл - Америка халқы үшін ғажап жеңіс. Американы, шекараны реттейміз" деп мәлімдеді.

Дональд Трамптың кандидатурасын ашық қолдаған Венгрия премьер-министрі Виктор Орбан Facebook-тегі парақшасынша АҚШ-тағы сайлау жайлы пост жариялап, "Әдемі жеңіс жолында тұрмыз" деп жазды.

Респубилкалық партия атынан АҚШ президенттігінен үміткер Дональд Трамп "құбылмалы" деп аталған штаттардың бәрінде дауыс саны бойынша алда келеді. Сарапшылардың айтуынша, Америкадағы сайлаудың ақтық нәтижесі осы штаттардағы дауыстың бөлінуіне байланысты болмақ.

Дауыс санау әлі жалғасып жатыр.

Дауыс санауды тікелей эфирде бақылап отырған АҚШ-тың негізгі ақпарат құралдары Солтүстік Каролина мен Джорджияда Дональд Трамп жеңді деп мәлімдеді. Пенсильвания, Висконсин, Мичиган, Аризона және Невада штаттарында да Дональд Трамп басым түсіп тұр. New York Times Республикалық партия ең тартысты штаттардың бірі Пенсильванияда да жеңуі мүмкін деген болжам айтты.

Дегенмен әзірге Демократиялық партия өкілі Камала Харристің де жеңістен үміті бар. Қазір Харристің 214 дауысы бар, ал жеңіске жету үшін 270 дауыс керек.