АҚШ-та жүрген қазақ студенті. (Фотоны Азаттықтың оқырманы Ырыс Аманкелді жолдаған).
АҚШ-та оқығысы келетін қазақстандық көбейген
Алматыда өткен білім жәрмеңкесінде АҚШ-тың 20-ға жуық жоғарғы оқу орны қазақстандықтарды оқуға шақырды. Олардың көбінің ақысы кейбір қазақстандық оқу орындарынан арзан.
Сәуірдің 5-і күні Алматы қаласында өткен «АҚШ-та білім алу» жәрмеңкесіне келген қазақстандық студент Ғани Асылбаев Америка университеттерінде білім алу мүмкіндігі туралы көбірек білгісі келеді.
– Қазақстанда білім беру саласы қанша қарыштап дамып жатса да, Батыстың біліміне жетпейді. Қазақстандық студенттер Батыста алған білімі мен тәжірибесін Қазақстанда қолдана алады. Бұл - студенттер үшін де, Қазақстан үшін де ұтымды. Әлемнің көптеген жоғарғы оқу орыны (ЖОО) шетелдік студенттерге қаржылай көмектесіп, тұратын орны немесе оқуының ақшасын жартылай төлейтінін бұрын да естігенмін, – дейді Ғани Асылбаев Азаттық тілшісіне.
УНИВЕРСИТЕТ ТАҢДАУ
Жәрмеңкеге АҚШ-тың 20-ға жуық беделді университеті қатысты. АҚШ-тың Қазақстандағы бас консулдығы соңғы алты ай ішінде Алматы қаласында өткізген осындай бес білім беру көрмесінің әрқайсысы өзінше ерекше әрі қызық. Көрменің негізгі
Студент Ғани Асылбаев көрмеде жүр. Алматы, 5 сәуір 2014 жыл.
мақсаты – АҚШ-та оқығысы келетін студенттер санын көбейту.
– АҚШ-тың әртүрлі университеттерін тартуға тырысамыз. Баласын оқуға түсіргісі келетін оқу орнын ата-аналар бірден таңдамайды. Бизнес-курс, бакалавриат, магистратура ғана емес, ағылшын тілі курстарын да ұсынамыз. Жәрмеңкеде аудиторияның сұранысын анықтап, соған сай университет, курстар ұсынуға тырысамыз, – дейді АҚШ бас консулдығының баспасөз, мәдениет және білім беру мәселелері жөніндегі атташесі Тристрам Перри Азаттық тілшісіне.
Студенттердің өтініші бір жылдан кейін талданады. Қазір шетелде оқу ақысын өзі төлеп, білім алып жатқан 6 мың қазақстандық студенттің 2 мыңы Америкада оқиды.
СТИПЕНДИЯСЫЗ ОҚУ
Әлемдегі университеті ең көп ел – АҚШ-та оқып, білім алғысы келетіндер саны жылдан жылға өсіп келеді. Ол жаққа «Болашақ» стипендиясы бойынша ғана емес, өздігінен барып білім алатын қазақстандықтар да көп. АҚШ консулдығы
АҚШ бас консулдығының атташесі Тристрам Перри. Алматы, 5 сәуір 2014 жыл.
атташесінің айтуынша, ол елде екі жылдық оқу 23 мың доллар тұратын қымбат университет те, бір жылға 6 мың доллар төлеп оқитын арзан университеттер де бар.
– Студенттердің әке-шешесінің мүмкіндігін жан-жақты қарап, бюджетін ескердік. Қазақстандық студенттер АҚШ университеттерінде оқып жүріп те толып жатқан гранттар алуына болады. АҚШ-та оқу ақысы Қазақстан менеджмент, экономика және болжау университетіне (КИМЭП) немесе Қазақстан-Британ университетінене (ҚБТУ) қарағанда арзан 100 университет бар. Егер үздік студент болсаңыз, сізді кез келген университет қуана қарсы алады, – дейді Тристрам Перри Азаттық тілшісіне.
Southern New Hampshire университетінің халықаралық қатынастар бөлімі
Southern New Hampshire университетінің өкілі Артур Канариа (оң жақта). Алматы, 5 сәуір 2014 жыл.
директоры Артур Канарианың Азаттық тілшісіне айтуынша, бұл университетке 10 өтініш түскен.
Білім беру қызметін ұсынатын Navitas компаниясының маркетинг жөніндегі менеджері Кирилл Мұратханов көрмеде таныстырған бес университетке түсуге 20 адам тіркелді.
Әлемдегі ең беделді әрі қымбат университеттердің бірі Стэнфорд университетіне жүз адам өтініш берген. Университет өкілдерінің түсіндіруінше, басқа оқу орындарына қарағанда, мұндағы каникул қысқа болғандықтан, студенттер оқуын тезірек бітіреді әрі бірден жұмысқа тұра алады.
Әлемдегі ең үздік университеттер тізіміндегі 200 жоғарғы оқу орнының жартысынан көбі – АҚШ-тағы оқу орындары. Ол елде 14 миллион студент оқиды.
Алма Азаттықта 2012 жылдан бері жарияланып келеді. ҚазҰУ-дің журналистика факультетін бітірген соң "Преступление и наказание", "Время По", "Мегаполис", "СолДат" сияқты БАҚ-тарда тілші болған. IWPR халықаралық ұйымымен кәсіби әріптестік байланысы болған. "Юридическая газета" мен "Сета" радиосында бас редактор қызметін атқарған.
