"Азан даусынан шошыдым". Қытай лагерінде қамауда болған қазақ

58 жастағы Нұрлан Көктеубай — Шыңжаңдағы түркі тілдес мұсылмандарға қатысты Пекин саясаты қалай өзгергеніне куә болғандардың бірі. Қазақстанға көшіп келіп, Шыңжаңдағы туыстарына жиі барып тұрған оны 2017 жылы Қытай билігі тергеп, кейін жеті ай бойы саяси қайта тәрбиелеу лагерінде қамауда ұстаған. Қытайдың "миллиондаған мұсылманды арнаулы орталықтарда ұстап, мәжбүрлі оқу мен еңбекке салуын" таяуда АҚШ "адамзатқа қарсы қылмысқа" балап, "геноцид" деп атады. Пекин мұны әдеттегідей жоққа шығарды. Нұрлан Көктеубай Азаттыққа берген сұхбатында лагерьде және одан шыққан соң көргенін баяндады.