Мариуполь: қоршаудағы украин сарбаздары Ресейге берілуден бас тартты
Мариуполь қаласында қоршауда қалған украин сарбаздары Ресей қорғаныс министрлігінің қару-жарақты тапсырып, берілу жайлы ұсынысынан бас тартты. Бұл туралы Украина премьер-министр Денис Шмыгаль хабарлады. Ол "украин сарбаздары қаланың кей бөлігін жауға бермей, қарсылық көрсетіп жатқанын" айтты.
Бұған дейін Ресей әскери министрлігі Мариупольдегі "Азовсталь" зауытына украин сарбаздары бекініп алғанын, ал Ресейдің "Новости" мемлекеттік ақпарат агенттігі ресейлік күштердің шабуылы нәтижесінде Украина теңіз жаяу әскерінің 36-жеке бригадасының командирі, Украина батыры Владимир Баранюк қаза тапты деп хабарлаған. Киев бұл жайында әзірше ақпарат берген жоқ.
Украина тұтқындарының сөзіне сүйенген Ресей қорғаныс министрлігі "Азовсталь" аумағында шамамен 2,5 мың адам барын айтты. Әзірге тәуелсіз дереккөздер Ресей билігінің мәліметін растаған жоқ.
Негізгі ақпараттар:
- Мариуполь қаласында қоршауда қалған украин сарбаздары Ресей қорғаныс министрлігінің қару-жарақты тапсырып, берілу жайлы ұсынысынан бас тартты. Бұл туралы Украина премьер-министр Денис Шмыгаль хабарлады. Ол "украин сарбаздары қаланың кей бөлігін жауға бермей, қарсылық көрсетіп жатқанын" айтты.
- Бұған дейін Украина президенті Владимир Зеленский егер қоршауда қалған Мариупольде украин әскерилері қаза тапса, Ресеймен келіссөзге нүкте қойылуы мүмкін деп мәлімдеген.
- Вашингтонның Киевке қауіпсіздігін нығайтуы үшін бөлген 800 млн доллардың көмегі аясында АҚШ жіберген қару-жарақ, оқ-дәрілер Украинаға келе бастады. Бұл жөнінде Америка үкіметіндегі дереккөзге сүйенген CNN телеарнасы хабарлады.
- Ресей әскері Украина қалаларын атқылауды тоқтатқан жоқ. Украина қарулы күштері Ресей Харьков маңындағы әскерін көбейтуге тырысып жатқанын айтады. Спутниктен түсірілген суреттерден әскери техникалардың Харьков облысы Липчановка елді мекенінде шоғарланғаны байқалады. Техниканың біраз бөлігі Изюм қаласына қарай бет алған.
- Ұлыбритания қорғаныс министрлігі Ресей Украинадағы соғыста тактикасын өзгерткенмен, мақсатын өзгерткен жоқ деп мәлімдеді.
- Журналистер "Москва" крейсерінде қаза болған теңізшінің аты-жөнін анықтады. Пентагон ресейлік "Мәскеу" крейсері Украинаның екі зымыраны түскеннен кейін суға батқан дейді.
- БҰҰ мәліметінше, соғыс басталғалы бері 5 млн адам Украинадан босып кеткен.
- Украина президенті Владимир Зеленский CNN арнасына берген сұхбатында Ресей басқыншылығы басталғалы бері шамамен үш мың украин жауынгері опат болып, он мыңы жараланғанын айтты.
- Ресей Ұлыбританияның бірқатар саясаткерлеріне елге кіруге тыйым салды.
Бір күнде 22 мың адам келді. Украинадан кеткендерден елге оралғандар саны алғаш рет асып отыр
Польшаның шекара қызметінің дерегінше, 16 сәуірде Украинаға 22 мың адам оралған. Ал сол күні Украинадан 19200 адам Польшаға өткен. Яғни, соғыс басталған 24 ақпаннан бері Украина аумағынан шыққандар санынан оралғандар саны алғаш рет асып отыр. Бұл туралы ВВС хабарлады.
Украинаға оралғандардың көбі туыстарымен жүздесу үшін бірнеше күнге ғана келген, олар шекара маңынан алысқа ұзамағанды жөн көреді. Алайда елде қалу үшін оралып жатқандар да бар. Өткен аптада Киев мэрі Виталий Кличко Ресей армиясы басқыншылық шабуылын жалғастырып жатқандықтан, мекен-жайын тастап кетуге мәжбүр болған украин азаматтарына үйге оралу әлі де қауіпті екенін ескерткен.
БҰҰ дерегінше, Ресей соғыс ашқалы бері Украинаның 4,8 млн-ға жуық азаматы елден кетуге мәжбүр болған. Содан бері 650 мыңнан астам адам Украинаға оралған.
7 млн-нан астам адам үй-жайын тастап, елдің шекара аймағына қоныс аударуға мәжбүр болған.
Эстония, Бельгия мен Болгария порттарына Ресей кемелерінің кіруіне тыйым салынды
Ресей туын тігіп алып теңізде жүрген кемелерге 17 сәуірден бастап Еуропа одағы елдері портына кіруіне тыйым салынды. Ресейге қарсы мұндай шараға Эстония, Бельгия мен Болгария да қосылды. Оның алдында Румыния мен Италия ресейлік кемелердің келуіне тыйым салған.
Бұл – Еуропа елдері Ресейге Украинаға қарсы басқыншылығы үшін Еуропа одағы салған санкциялардың бесінші пакетіне сәйкес қабылданған шара. Мәскеу Украинаға соғыс ашқан 24 ақпанға дейін Ресей туы астында жүріп, содан кейін басқа елдің туын іліп алған кемелер де осы санкцияға ілігеді.
Эстония экономика және инфрақұрылым министрі Таави Асстың мәлімдеуінше, күллі Еуропа Ресейге тәуелді болмау үшін экономикалық қызметін қайта қарап жатыр.
"Кремль агрессиясын доғаратын сыңай танытпай отыр, сондықтан Еуропа [Мәскеудің] басқыншылық соғысты жалғастыру ниеті оған өте қымбатқа түсетіндей етудің стратегиялық жолдарын қарастырып жатыр. Елдер ғана емес, Ресеймен қандай да бір байланысы бар кәсіпорындар да экономикалық қызметін жаңа жағдайға қайта бейімдеуі тиіс" деген Аас.
Ресей туымен жүрген кемелер Эстония порттарына тек көмек қажет болған ерекше жағдайда, оның өзінде полиция департаменті мен шекара күзетін алдын ала ескерткеннен кейін кіруі мүмкін деп хабарлаған.
Болгария билігі де өз аумағындағы теңіз және өзен порттарына Ресей кемелерінің кіруіне тыйым салды. Бұл туралы ақпарат осы елдің теңіз әкімшілігі порталында жарияланды.
Бұған дейін Еурокомиссия басшысы Урсула фон дер Ляйен Ресей өнеркәсібіне ықпал ету мақсатында ресейлік кемелердің Еуропа порттарына кіруіне тыйым салынатынын мәлімедеген.
ПІКІРЛЕР