Дәріні шығарушы Гамалея атындағы орталық Ресей денсаулық сақтау министрлігіне коронавирусқа қарсы "Спутник V" екпесін 12 мен 17 жас аралығындағы жасөспірімдерге егуге рұқсат беру туралы өтініш берді. Бұл туралы ведомство өкілі "Интерфакс" агенттігіне хабарлады.
Шілдеден бастап Мәскеуде жаөспірімдер қатысқан клиникалық сынақ жүргізілген. Оның нәтижесі әлі жарияланбады.
"Спутник V" – Ресейде тіркелген төрт вакцинаның ішінде жиі қолданылатын екпе. Қазір ол 18 жастан бастап ересектерге егіліп жатыр.
Көптеген елде 12 мен 17 жас аралығындағы жасөспірімдерге америкалық Pfizer вакцинасы салынып жатыр. Жуырда Pfizer'ді бес жастан бастап балаларға егу сынағының сәтті аяқталғаны хабарланған. Бұған дейін Қазақстан денсаулық сақтау министрлігі қазан айында Pfizer вакцинасын жасөспірімдер мен жүкті әйелдерге сала бастайтынын мәлімдеген.
Дүниежүзілік денсаулық сақтау ұйымы және ЕО мен АҚШ-тың дәрі-дәрмекті қадағалайтын органдары ресейлік вакциналардың ешқайсысын мақұлдамаған. Бірақ соған қарамастан Аргентина, Сербия, Венгрия, Сан-Марино сияқты бірқатар елдер "Спутник V" екпесін жаппай вакциналау науқанында пайдаланып жатыр. Ол Қазақстанда да 18 жастан асқандарға салынып жатыр.
Ресейде кейінгі күндері коронавирус жұққандар мен одан қайтыс болғандардың саны қайта өскені байқалады. Өткен тәулікте ресми мәлімет бойынша, 820 адам коронавирустан қайтыс болған. Елде вакциналау көрсеткіші де көптеген елдермен салыстырғанда төмендеу.
ОҚИ ОТЫРЫҢЫЗ
Моңғолия вакциналау бойынша көп елден озып кетті. Оған екі нәрсе көмектестіВакцинаны шығарған институт: Жыл соңына дейін QazVac'ты Швейцария тіркейді Қазақстан Pfizer екпесін тіркедіЖаңаөзенде коронавирус вакцинасын салуды міндеттеуге қарсылық акциясы өтті Гамалея орталығы "Спутник V" екпесін "дельта" вариантына бейімдеді