74 жастағы оппозициялық саясаткер Жасарал Қуанышәлин ауыр науқастанып, ауруханаға түскен. Бұл ақпаратты оның жақындары мен жақтастары хабарлады. Саясаткердің әйелі, ақын Айсұлу Қадырбаеваның сөзінше, Қуанышалин үйде жалғыз болған.
– Кейінгі жарты жылда өзім де ауруханада жатырмын. Соңғы рет сөйлескенімде "маған ауруханаға жат деп жатыр" деген еді. "Маған қарайламай, жата бер" дедім. Бүгін серіктері телефон соғып, "есін білмей жатыр" деп хабарлады, – деді Айсұлу Қадырбаева.
Қоғам белсенділері Бибігүл Жоламанова мен Арман Иманжановтың айтуына қарағанда, Жасарал Қуанышәлинді бүгін сағат 12.00 кезінде жедел жәрдем ауруханаға әкеткен. Қазір ол Алматыдағы қалалық жедел жәрдем ауруханасының жансақтау бөлімінде жатыр.
Жасарал Қуанышәлин 1994-95 жылдары Қазақстан Жоғарғы кеңесінің депутаты болған. Кейін оппозицияға өтіп, түрлі ұйымның қатарында билік саясатын ашық сынап келді. Кейінгі жылдары партия құруға талпынғанымен, оларды әділет министрлігі әртүрлі уәжбен тіркемеген. Президент сайлауына түсуге ниет те білдіргенімен, кандидат ретінде тіркеле алмаған.
ОҚИ ОТЫРЫҢЫЗ "Алға, Қазақстан" партия тіркеу үшін алтыншы рет құжат тапсырып, министрліктің екінші жауабын сотқа берді ОҚИ ОТЫРЫҢЫЗ Жасарал Қуанышәлин президент сайлауына түсуге ниетті екенін жариялады