Қарағанды облысында Бұхар жырау ауданы мен Теміртау қаласы маңындағы тасқын суда қалған бірқатар елдімекендердің ондаған тұрғыны сәуірдің 13-інен бастап «Асега» қонақ үйіне уақытша орналастырылған. Сәуірдің 16-сы күні теміртаулық кәсіпкерлердің бірі тасқаннан зардап шеккендерге жаңа көрпе-жастық, ыдыс-аяқ және өзге де тұрмысқа қажетті заттар әкелді. Зардап шеккендерді «алдағы уақытта қайда тұрамыз, баспанамызды жөндеуге жәрдем бола ма, залалды кім өтейді?» деген сауалдар толғандырады. Тасқын салдарынан тұрғындардың үйлері бүлініп, мүлік-жихаздары мен тұрмыстық техникалары істен шықан, көбінің малы қырылған.