Оңтүстік Дакотада жыл сайын ұйымдастырылатын Sturgis Motorcycle Rally мотоцикл раллиіне қатысуға биыл жүздеген мың байкер келеді деген болжам бар. Бұл шара АҚШ-та Covid-19 инфекциясының тез әрі ауқымды таралуына апарып соғуы мүмкін деген қауіп бар. Қазір АҚШ-та коронавирустың тез жұғатын "Дельта" варианты тарап, індет өршіп тұр.
Ұйымдастырушылар жұма күні басталған және 10 күнге созылатын шараға кемінде 700 мың адам жиналады дейді.
Қоғамдық денсаулық сақтау мамандары АҚШ халқының жартысы толық көлемде вакцина алғанына қарамастан, кейінгі екі аптада күнделікті анықталатын науқас саны бұрынғыдан екі есе көбейіп отырғанын айтады. Сондықтан Стерджисте ұйымдастырылып отырған мотоцикл раллиі инфекцияның қарқынды түрде тарау көзіне айналуы мүмкін деп ескертті мамандар.
Бұған қоса Чикагодағы төрт күнге созылатын Lollapalooza музыка фестивалі де алаңдауға себеп болып отыр. 4 тамызда басталған бұл шараға, болжам бойынша, 100 мыңнан астам адам келмек. Дегенмен фестивальді ұйымдастырушылардың қолында қоғамдық денсаулық сақтау хаттамалары бар: іс-шараға қатысам деп келгендер "вакцина паспортын" немесе ағзасында Covid-19 жоғын анықтаған ПТР тестінің теріс нәтижесін көрсетіп, маска тағып жүруі керек.
Бірақ сарапшылар вакцина алғандардың өзі "Дельта" вариантын жұқтырып, оны әрмен қарай таратуы мүмкін екені дәлелденген қазіргі кезде бір жерге жаппай адам жинау қатерлі екенін айтады.
Америкалық Джонс Хопкинс университетінің дерегінше, пандемия басталғалы бері АҚШ-та 35,7 млн адамға вирус жұғып, 616 мың адам көз жұмған. Қазірге дейін 166 млн адам, яғни ел халқының жартысынан сәл астамы коронавирусқа қарсы вакцинаны толық көлемде алған.
Әлемде осы індет тарағалы бері 200 млн-нан астам адамға коронавирус жұғып, 4 млн адам қайтыс болған.
ПІКІРЛЕР