Ресей армиясы Украинада "баяу ілгері жылжып келеді", бірақ қазірдің өзінде үлкен шығынға ұшырады. 26 мамырда АҚШ қорғаныс министрлігінің жоғары лауазымды бір өкілі осылай деп мәлімдеді.
Аты-жөні аталуын қаламаған шенеуніктің болжамына қарағанда, украин жауынгерлері әзірге "қатты қарсылық көрсетіп жатқанымен", Ресей Украина қарулы күштеріне, Донбастағы түрлі нысандар мен қалаларға ауыр соққы жасап жатыр.
Пентагон өкілі украин армиясының "Харьков төңірегінде әжептәуір нәтижеге жеткенін", Ресей 90 күн бойы бақылауда ұстаған бірқатар аумақты қайтарып алғанын атап өтті.
АҚШ қорғаныс министрлігінің мәліметінше, Ресей армиясы соғыс басталғалы бері кем дегенде 1000 танк, 36 ұшақ және 50-ден аса тікұшақтан айырылған, дегенмен оның Украина қарулы күштеріне қарағанда техникасы мен жауынгері әлдеқайда көп. Америкалық әскеридің айтуынша, қазір Украинада Ресейдің 110 батальон-тактикалық тобы орналасқан, олар Славянск және Краматорск бағытында әжептәуір ілгері жылжи алды.
Пентагон шенеунігі Ресей қорғаныс министрлігінің 50 жастан асқан ер азаматтарға әскерге баруға рұқсат бергенін де айтты. "Мәскеу майданға қосымша күш тартудың түрлі амалын іздеп жатыр", - деді америкалық шенеунік.
ПІКІРЛЕР