2021 жылғы тамызда Ауғанстанда билікке келген "Талибан" қозғалысы әйел құқығы ахуалын айтарлықтай дағдарысқа ұшыратты.
Бұл туралы 11 тамызда халықаралық Human Rights Watch (HRW) құқық қорғау ұйымы мәлімдеді. Онда тәліптер басқарып отырған Ауғанстан жасөспірім қыздарға алтыншы сыныптан кейін мектепке баруға тыйым салған әлемдегі жалғыз ел атанғаны айтылған.
HRW өкілдері мәлімдемеде тәліптердің "әйелдердің еркін жүріп-тұру құқығын шектеп, оларға білім алуға, спортпен шұғылдануға, тіпті саябақта серуендеуге тыйым салғанын, медициналық көмек алу құқығын шектегенін" жазады.
Ауғанстанда гуманитарлық дағдарыс тереңдеген сайын ауған әйелдеріне қысым күшейіп отыр. Әйелдер гуманитарлық дағдарыс кезінде ең қатты зардап шеккен топқа жатады, деп мәлімдеді HRW.
Ұйымның Азия бөлімінің зерттеушісі Ферешта Аббаси шетел үкіметерін Талибан басшылығын және Ауғанстандағы қылмыс жасағандарды жауапқа тартуға шақырды.
БҰҰ-ның гуманитарлық мәселелерді үйлестіру жөніндегі басқармасының мәліметінше, Ауғанстан халқының жартысынан астамы - 23 миллион адам тамаққа зәру. Тәліптер билігі орнатқан шектеулер әйелдер мен қыздардың медициналық көмек алуын қиындатып жіберді. Тәліптердің қыздарға білім алуға тыйым салуы салдарынан болашақта денсаулық сақтау саласында маман жетпей қалуы мүмкін.
ПІКІРЛЕР