Қызылордадағы "мемлекет мұқтаждығына бола" сүрілетін үйдің иесі Үмітгүл Әлмағамбетова әкімдік уақытша ұсынған баспанаға барудан бас тартты. Ол "үй салуға жұмсаған қаржым өтелгенше кетпеймін" дейді. Сот оның "Дачный" деп аталатын аумақтағы үйін "Батыс Еуропа - Батыс Қытай күрежолы салынатын жерде орналасқандықтан ешқандай өтемақысыз мемлекетке қайтарылуы тиіс" деген шешім шығарған. 26 қазанда Қызылорда облысы сот актілерін орындау департаментінің басшысы Ақәділ Махамбетов "үйдің бәрібір сүрілетінін, Әлмағамбетоваға уақытша баспана берілетінін" айтқан еді. Қызылорда, 29 қазан 2014 жыл.