«Стан ТВ» тілшісі Азамат Арыстановтың айтуынша, бүгінгі сотқа журналистерді кіргізбеген. «Ақмарал есімді судьяның хатшысы «Сот рұқсат берген жоқ, себебін білмеймін» деп ақпарат құралдарының сот залына кіруіне бөгет жасады» дейді ол.
«ЕКІ ЖЫЛДЫҚ СЫНАҚ»
Жаңаөзен оқиғасын зерттеуге құрылған қоғамдық комиссия өкілі Гүлнар Досова:
- Мен жаңа Тамарамен сөйлескенмін. Ол екі жыл шартты жаза бергенін айтты. Бұдан бөлек қандай да бір акция, митингілерге қатысуға шектеу салған екен, - деп хабарлады.
Бұл ақпаратты үкім оқылған Жаңаөзен қалалық сотының баспасөз қызметі де растады.
- Тамара Ерғазева 354-баптың 2-бөлімі бойынша кінәлі деп танылып, шартты түрде екі жыл мерзімге бас бостандығынан айыруға, қылмыстық кодекстің 63-бабына сәйкес екі жыл сынақ мерзімі тағайындалды, - деді баспасөз қызметінің аты-жөнін айтпаған өкілі.
Қазақстанның қылмыстық кодексінің 354-бабы "Жалған жауап беруге немесе жауап беруден жалтаруға, жалған қорытынды беруге не қате аударуға сатып алу
не мәжбүр ету" деп аталады.
«ЕКІ ЖЫЛҒА СОТТАЙТЫНДАЙ ЕШТЕҢЕ ЖАСАҒАН ЖОҚПЫН»
Журналист Азамат Арыстановтың айтуынша, Тамара Ерғазева соттан кейін "үкіммен келіспейтінін, бірақ сот үкімін апелляцияға беру-бермеу мәселесін әлі шешпегенін" айтқан. Журналист сотталушы Тамара Ерғазеваның сот үкімімен келіспегенін айтып:
- «Мені екі жылға бас бостандығымнан айыратындай ештеңе жасаған жоқпын» деді, - дейді.
Оның сөзіне қарағанда, Тамара Ерғазева «журналистермен де араласуға тыйым салғанын» айтыпты.
БІР СӨЗ - ЕКІ ЖЫЛ
Жаңаөзендегі оқиға бойынша айыпталған Жаңбыр Ерғазевтің әйелі Тамара Ерғазева наурыздың 14-інде тұтқындалып, «Үнпарақ таратты» деген айыппен үйқамаққа алынған.
Тамара Ерғазеваны айыптауға негіз болған оқиға 2012 жылы наурыздың 14-і күні болған. Жаңаөзен тұрғыны Дәмелхан Жарылғасынованың айтуынша, осы күні Тамара Ерғазева мен күйеулері қамауда отырған бірнеше әйел айыптау қорытындысымен танысқан. Қағазды оқып шыққан Тамара Ерғазева күйеуіне қарсы куәлік берген азаматтың үйіне барып, қақпасына «Неге жалған куәлік бересің?» деген мазмұндағы сөздер жазылған парақ жапсырып кеткен. Ал ол адам полицияға шағымданған.
Жаңбыр Ерғазев - жеті ай бойы Жаңаөзен қаласының алаңында тұрып, еңбек дауының шешілуін талап еткен мұнайшылардың бірі. Жаңаөзен оқиғасы кезінде оң аяғына оқ тиіп жараланған. Бір айдан соң қамауға алынып, қаңтардың 16-сынан бері облыстық ішкі істер департаментінің тергеу абақтысында жатты. Қазір оның соты жүріп жатыр.
Өткен аптада болған сот процесінде прокурор Әжібаев Тамара Ерғазеваға үш жыл шартты жаза сұраған болатын.
