Ирақтағы сүнниттер референдумда Ата заң жобасына қарсы дауыс беруге шақырады

БАҒДАД. Лондонда шығатын Sunday Telegraph басылымына берген сұхбатында Ирақтың сыртқы істер министрі Хошьяр Зибари Ирақтың жаңа конституциясы референдумда қабылданбайтын болса, ел ала-сапыранға ұрынады деп мәлімдеді. Жаңа Ата заң, оның пікірінше, қазіргі билікті заңдастырып, елдегі бүлікті басып тыныштық орнатуға мүмкіндік береді. Кеше сүнниттердің тобы “жаңа конституция елді жік-жікке бөледі” деп мәлімдеп, сайлаушыларды 15 қазанда өтетін референдумда оған қарсы дауыс беруге шақырды. Ирақтың 18 өлкесінің кемінде 3-еуінде сайлаушылардың 2/3-сі қарсы дауыс берсе, конституция қабылданбайды. 26 млн. халықтың 15.7 млн.-ы дауыс бере алады. Кеше Ирақ үкіметі референдумға дейін комендант тәртібін орнатты.