АҚШ билігі Гуантанамо базасында терроризм айыбымен 11 жылдан бері қамауда отырған Ауғанстан азаматын босатуға рұқсат етті. Арнайы комиссия шешімінде Мухамед Каминнің өткен іс-әрекеті жайлы объективті түрде баяндағаны және қамауда отырғанда «үлгілі тұтқындардың бірі» болғаны айтылған. Сонымен бірге сарапшылар оны түрмеде болған кезде экстремистік және анти-америкалық көңіл-күй білдірген жоқ деп сипаттаған.
Осы шешімнің негізінде Камин бостандыққа шығуы мүмкін. Бұл мәселе енді оны ауыстыруға қатысты келіссөздердің нәтижесіне байланысты шешілмек: тұтқынды Отанына қайтаруы мүмкін немесе үшінші бір елге жіберуі ықтимал.
Камин туралы ақпараттарда оның қарулы топтармен, соның ішінде «Әл-Қаида» ұйымымен байланыста болғаны көрсетілген. Сонымен бірге, бұл ақпараттардың бәрі Каминнің сөзінен жазылғаны, ал ол кейде өз айтқанына қарама-қайшы сөйлегені айтылған,.
Мухамед Каминді 2003 жылы Ауғанстан билігі қолға түсірген. 2004 жылы ол Гуантанамо түрмесіне ауыстырылған.
