Осы аптада Қытайдағы қазақ тілінде, төте жазумен шығатын сайттардың ішінен оқырмандар көп оқитын kultegin.com мен жастарға арналған bozbala.com сайттарына шолу жасадық.
«БОЗБАЛА»: «БЫТ-ШЫТ КӨЛІК» ПЕН «ӘЛЕУЛАЙЛАР»
Әдетте жастардың сұхбаттары мен хаттарына көбірек орын беретін bozbala.com сайты бұл аптада «Тайкешкенге дау жүрмейді» атты көлемді мақала жариялады.
Қытай мен Моңғолияның арасындағы Тайкешкен шекара бекетінің атауы жайындағы мақала 2006 жылы «Алтай аясында» атты журналдың алтыншы санында басылған екен. Мақала екі ел арасына алғаш шекара бекеті орнатылған сәтте күзет қызметіне орналасқан Тайкешкен Жанпейісұлының атымен аталған төбенің кейін шекара бекетінің атына айналғанын айтады.
Бұл сайтта оқырмандар талқысына салынған тағы бір тақырып «Жұңго (Қытай – ред.) көліктері быт-шыт» деп аталады екен.
«Жақыннан бері Қазақстанда Жұңгода өндірілген жүк көліктеріне қатысты талқы-талас күшейіп келеді. Соған байланысты қытайшыл кейбір азаматтар «Өзімізде жүріп жүргенде жап-жақсы, Қазақстан мен Тәжікстанға барғанда неге
Қытайдағы көліктер. Пекин, 2 қыркүйек 2010 жыл. (Көрнекі сурет)
мәселе туа қалады?» депті. Осы қаншалықты дұрыс?» деген сауал қояды автор.
Сайттың жазуынша, «сапасының төмендігіне байланысты Қытай көліктерінің бағасы да арзан. Соның салдарынан Орта Азия базарларын жаулап алды». Оқырмандары да автордың бұл пікірін қоштап, «тек көліктер ғана емес, Жұңгода өндірілетін барлық тауарлардың сапасы өте төмен» деп түйіндейді мақаланы.
Bozbala.com сайтында жарияланған тағы бір көлемді мақала – «Поэзия және ақындардың «әлеулайлары». Мақала авторы Жеңісхан Мұқатайұлының жазуынша, «Бүгінде ақындар – аз да, өлең жазғыштар – көп. Себебі қазіргі өлең жазғыштардың шығармалары тақырыбынан бастап қайталауға ұрынған. Соның салдарынан бір тақырыпта жазылған бірнеше өлеңдерінде ұйқастар мен теңеулері бір-біріне ұқсас болып кетеді. Мәселен ақындардың барлығы қалам тербейтін тақырыптардың бірі – көктем. Ал сондағы ұйқастар «сұлу», «көрікті», «қызыл гүл», «ырғалып» деп келе береді».
«КҮЛТЕГІН»: «ЖҰҢГО ТЕРРИТОРИЯСЫ» МЕН ҚАЗАҚ БОКСШЫСЫ
Kultegin.com сайты осы аптада қытайлық Жоң Шиңфуң есімді автордың «Абайдың ел қарастылық өзгерістеріне сарап» атты мақаласын талқылаған.
Абай (ортада) ұлдары Ақылбай (сол жақта) және Тұрағұлмен бірге. (Көрнекі сурет)
«Қазақстанның атақты ақыны Абай туған Шыңғыстау районы Жұңгоға тәуелді территория еді. 1864 жылы теңсіз келісімдер арқылы орыстардың қолына өткен. Абайдың ел қарастылығының ықтиярсыз өзгертілуі оның шығармашылығына әсер жасады» деп жазады Жоң Шиңфуң қазақ ақыны жайлы мақаласында.
«Күлтегін» сайты осы аптада жариялаған мақаланың бірі «Қытайда «Нью-Йорк Таймс» газетінің сайтына тосқаулық жасалды» деп аталады. Мақала «Қытай премьер-министрінің байлығы туралы ақпар шыққанын, соған байланысты қытайдың ресми билігі аталған газеттің қытайша және ағылшынша сайттарына тосқауыл қойғанын, ақпаратты растамағанын» жазған.
Қытайда «әлеуметтік теңсіздіктің ара салмағы тым алшақтап бара жатқанын» айтқан мақала авторы «қытай үкіметі шенеуніктерінің байлығын жария ету - қауіпті» дейді.
«Алайда Қытай ақпарат құралдары үкімет басшысын «Уенам әке» деп атайды. Себебі су тасыса да, жер сілкінсе де дәл осы премьер-министр барып халықтың көңілін жұбатады» деп жазады автор.
Сайттағы енді бір материал – «Тағы бір темір жұдырықшыдан үміт бар» атты мақала. Мұнда Алтай аймағынан шыққан 15 жастағы Тоқтархан Таңатқанұлы есімді боксшы баланың биыл тамыз айында Үш аймақ (Іле, Алтай, Тарбағатай аймақтары – ред.) бойынша өткен жасөспірімдер арасындағы бәсекеде қарсылас шыдатпағаны, ал күзде ел бойынша өткен сайыста бесінші орынға тұрақтағаны айтылған.
«Соңғы жарыста Тоқтарханның қарсыластары 20 жасқа келген атпалдай азаматтар болғанын, соған қарамастан ол өз салмағы бойынша алдыңғы бестікке кіргенін» жазған сайт «Қанаттың (боксшы Қанат Исламның - ред.) ізін басар ұл келді» деп, оқырмандарынан сүйінші сұрайды.
