АБРАМОВИЧ ПЕН БЕРЕЗОВСКИЙ ЖАСАҒАН «ЖАРНАМА»
The Independent басылымының жазуына қарағанда, соңғы кездері шетелдік фирмалар мен магнаттар Ұлыбритания жерінде соттасуға көбірек ден қоя бастаған. Соңғы бес жылдағы Ұлыбритания жоғарғы сотында қаралған істердің 62 пайызы (1 мың 600-ден астам іс) шетелдік компаниялардың даулары болған.
«Лондонның орталығындағы құны 300 миллион фунт-стерлинг болатын «Роллс» ғимаратының заманауи техниканың озық үлгісімен жабдықталған 31 сот залында Грекияның тасымалдаушы компанияларынан бастап Сауд Арабиясының компанияларына дейінгі түрлі тараптар әділдік іздеп соттасып жатады. Бұл істердің көпшілігінің Британияға ешқандай қатысы жоқ» деп жазады басылым.
Британиялық заңгерлер 2012 жылы шетелдік дауласушылардың арқасында 3,5 миллиард фунт-стерлинг табыс тапқан.The Independent
Зерттеулерге қарағанда, Лондон аса қымбат сот істерінің астанасына айналып, былтыр бір жылда британиялық заңгерлер шетелдік дауласушылардың арқасында 3,5 миллиард фунт-стерлинг табыс тапқан.
Ресейлік миллиардер Роман Абрамович пен бизнесмен Борис Березовский арасындағы 3 миллиард фунт-стерлинг дауға түскен істе адвокаттардың өздеріне ондаған миллион фунт ақша төленген. Мысалы, адвокат Джонатан Сампшон (қазір жоғарғы соттың судьясы) осы істе 3 миллион фунт-стерлинг ақы алған.
Әблязов пен БТА
ӘБЛЯЗОВ ІСІ
2009 жыл - 2005-2009 жылдары "БТА банкін" басқарған Мұхтар Әблязов банкті Қазақстан үкіметі мемлекет меншігіне алған соң Лондонға кетті.
2011 жыл - Ұлыбритания Қазақстан президенті Назарбаевты сынайтын оған саяси баспана берді. Қазақстан Әблязовті 6 миллиардтай АҚШ долларын жымқырды деп айыптап, Ұлыбритания сотына жүгінді. Әблязов істің "саяси астары" бар деп мәлімдеді. Қазақстан Ұлыбританияға оны экстрадициялау туралы өтініш түсірді.
2012 жыл - Ақпанда Лондон соты Әблязовті "сотты құрметтемегені" үшін 22 айға қамауға алып, активтерін құрсаулауға үкім етті. Әблязов бой жасырды. Лондон соты Әблязовтен БТА пайдасына 2,1 миллиард доллар өндіруге үкім шығарды.
2013 жыл - Шілдеде Әблязов Францияда Украина талабы бойынша ұсталды.
2014 жыл - Қаңтарда Франция соты Әблязовті Ресей мен Украинаға экстрадициялауға үкім етті. Францияның кассациялық соты ол үкімді тоқтатты. 24 қазанда Лион соты оны Ресей мен Украинаға экстрадициялауға санкция берді.
2015 жыл - Қыркүйекте Әблязовті экстрадициялау туралы бұйрыққа Франция премьері Мануэль Вальс қол қойды.
2016 жыл - Желтоқсанда Франция мемлекеттік кеңесі Әблязовті Ресейге экстрадициялау туралы бұйрықтың күшін жойды. Желтоқсанның 10-ы ол абақтыдан босады.
2017 жыл - Қазақстан Әблязовке "ұйымдасқан қылмыстық ұйым құрды" деген айып тағып, шығынды 7,5 миллиард доллар деп мәлімдеді. 2017 жылы оны Қазақстан тергеуге шақырды, бірақ Әблязов келмеді.
2017 жыл - 7 маусымда Алматы соты Әблязовті "БТА банкіндегі қаржы жымқыру" ісі бойынша сырттай 20 жылға соттады.
2018 жыл - Қазақстан билігі қуғындағы оппозициялық саясаткер Мұхтар Әблязовтің "Қазақстанның демократиялық таңдауы" (ҚДТ) қозғалысын экстремистік ұйым деп танып, қызметіне тыйым салды.
2008-2013 жылдар аралығында Лондонда ресейліктердің 75 ісі қаралған. Олардың саны жыл сайын өсіп келеді.
«ҚОМАҚТЫ ТАБЫС КӨЗІНЕ АЙНАЛҒАН ҚАЗАҚСТАН»
«Бірақ ең таңқаларлығы – 16 миллион тұрғыны бар бұрынғы совет республикасы Қазақстанның заңгерлер үшін қомақты табыс көзіне айналуы. Қазақстанға қатысты 86 сот ісінің көпшілігі елдегі ең ірі банктердің бірі «БТА банк» пен оның бұрынғы басшысы Мұхтар Әблязовқа қатысты. Әблязов 6 миллиард доллар қаржыны жымқырды деп айыпталып отыр» деп жазады басылым. Бұл процесс 11 түрлі сот істеріне бөлініп, 50 шақты заңгердің қатысуымен жүріп жатыр.
«Толассыз сот істерінің ордасы болып бара жатқан Қазақстан Ұлыбританияны магнаттар мен халықаралық компаниялардың қатысуымен өтетін құқықтық тайталастың отанына айналдырды. Осы бір мұнайға бай Азия елі ақысы жоғары лондондық адвокаттардың аса ерекше табыс көзі болды» деп жазады ұлыбританиялық басылым.
Жоғарғы соттың келісім-шарттарға байланысты дауларды шешетін бөлімшесі – коммерциялық сот шығарған 705 шешімге көз жүгіртсек, британиялық судьялар мен заңгерлерге «жұмыс беріп» отырған «демеушілер» тізімінің басында АҚШ тұр, одан кейінгі орынды Қазақстан мен Швейцария бөліскен.
«Сарапшылардың айтуынша, Абрамович пен Березовскийдің арасындағы сияқты аса әйгілі әрі қомақты сот ісінің арқасында енді Лондон сотынан әділдік іздеушілердің қатары көбейе бермек» деп болжайды The Independent басылымы.
