Қазақстан бас прокуратурасы Өскемен экологиясының нашарлауына байланысты "Қазцинк" металлургиялық кешенінде тексеріс жүргізуді мақұлдады. Бұл жөнінде премьер-министрдің депутаттарға жолдаған жауабына сүйенген жергілікті БАҚ жазды.
Қазақстан сенатының депутаттары премьерге Өскеменнің экологиялық ахуалын бақылайтын үкімет комиссиясы жөнінде сауал жіберген. Қараша мен желтоқсанда Өскеменде ауадағы зиянды заттар мөлшері рұқсат етілген нормадан асып кеткені хабарланған еді.
"Бас прокуратура "Қазцинк" жауапкершілігі шектеулі серіктестігінің Өскемен металлургиялық кешенінің қызметіне экологиялық реттеу және бақылау комитетінің мамандарын тарта отырып, экологиялық заңнаманың сақталуына тексеру жүргізуге келісті" деді премьер-министр Олжас Бектенов жауапта.
Оның сөзінше, Шығыс Қазақстан облысы және Өскемен қаласының 2024-2026 жылға арналған "жол картасы" аясында табиғатты қорғау шаралары қарастырылған. Мұндай шараларға Өскемен металлургиялық кешенінде күкірт диоксиді газын тазарту қондырғыларын жаңарту арқылы күкірт диоксиді шығындыларын 2,2 мың тоннаға азайту; Риддер металлургиялық кешенінде "Гидрополимет" цехын салып, күкірт диоксиді қалдықтарын 714 тоннаға азайту сияқты шаралар кіреді.
Биліктің пікірінше, мұндай шаралар Шығыс Қазақстан облысында ауаға таралатын зиянды қалдықтар көлемін 10-20 пайызға азайтуға көмектеседі.
Өскемен халқы ауа сапасы нашар деп үнемі шағынады. Белсенділер кейінгі жылдары қала әкімдігіне экология мәселесі бойынша митинг өткізетінін айтып бірнеше рет жазбаша ескерту жолдаған. Бірақ жергілікті билік көбіне келісім бермей келген.
Қараша айында Өскеменді қалың тұман басып, соның салдарынан бірқатар ауылдарда оқушылар қашықтан оқуға көшірілген. Ал әуе рейстері жарты күнге кешікті. Сол кездегі Өскеменнің экологиялық ахуалы әбден нашарлағаны айтылды. Әлеуметтік желі қолданушылары шұңқырда орналасқан қала түтінге бөгіп, іргедегі таудың төбесінен көрінбей қалғанын дәлелдейтін видеолар жариялады.
"Қазцинк" ЖШС - мырыш, қорғаныс, мыс және құнды металл өндіретін қазақсандық ірі металлургиялық компания.
