Ресей президенті Владимир Путин мигранттардың балаларын мектеп пен балабақшаларға қабылдауға шектеу қоятын заңға қол қойды.
Құжат заңсыз мигранттардың балаларын қабылдауға толық тыйым салады. Одан бөлек, орыс тілін нашар білетін шетел азаматтарының балалары да мектепке қабылданбайды.
Заңдағы шектеулер мемлекеттік және жергілікті мектептер, мүгедектерге арналған арнайы мектептер, үйірмелер мен секцияларға қатысты.
Құжат Ресейде еңбек мигранттарының балаларының қоғамға араласу мүмкіндігін шектейді және еңбек мигранттарының өмір сүруін қиындататын өзге де заңдар қабылданған шақта мақұлданып отыр.
19 желтоқсан күнгі тікелей эфир кезінде заң жобасына түсініктеме берген Путин оны уақыт талабына сай қабылданған құжат деп атаған. "Тілді білмейтін баланы мектепте қалай оқытуға болады? Онда оның орыс тілімен бөлек айналысу керек, ал оған кім төлейді?" деді президент.
