Жамбыл облысы Қордай ауданында жанжалдан қаза болғандардың саны онға жетті деп хабарлады ішкі істер министрінің орынбасары Алексей Калайчи.
"9 ақпан таңертеңгі дерек бойынша он адам қаза болды" деді Алексей Калайчи жексенбі күні өткен брифингте. Биліктің айтуынша, 8 адам - жанжал кезінде, екі адам реанимацияда көз жұмған.
Ақпанның 7-сі күні Жамбыл облысы Қордай ауданында тұрғындар арасында жанжал болып, 10 адам қаза болған, 40-тан астам адам жарақаттанған.
8 ақпанда кешке Қордай ауданында төтенше жағдай жарияланды.
Жанжал болды делінген Масаншы ауылының кейбір тұрғындары 9 ақпанда Азаттыққа ауылда дүкендердің көбі өртеніп кеткендіктен азық-түлік, нанды басқа жақтан алуға мәжбүр болып отырғанын айтты. Масаншыға іргелес жатқан Қаракемер ауылының тұрғындарының айтуынша, ауылды әскерилер қоршап, ешкімді елді мекеннен шығармай отыр.
Полиция жанжалға байланысты "Адам өлтіру" және "Тәртіпсіздік ұйымдастыру" бабы бойынша қылмыстық істер қозғады. Биліктің айтуынша, жаппай төбелеске шамамен 300 адам қатысқан. 30-дан астам үй өртенген, 23 көлік бүлінген, 15 шақты сауда нысаны қираған.
Жанжалдан кейінгі Масанчи ауылындағы жағдай
Қордайдағы жанжалдан кейін кейбір дерек бойынша кемінде 4500 адам Қазақстаннан Қырғызстанға қарай өткен. Қазақстан мен Қырғызстанның ресми орындары әзірге бұл дерекке байланысты түсініктеме бермеді.
ПІКІРЛЕР